Friday, June 12, 2009

කැළණියේ අවුලේ මුල මර්වින් ද?

කැළණිය විශ්වවිද්‍යාලයේ ඊයේ ඇතිවූ ප්‍රශ්ණය සැවොම දනිත් යයි සිතමි. කෙටියෙන් කිවහොත් වි.විද්‍යාල ප්‍රජාව හා ගම්වාසීන් අතර ගැටුමකි. ස්වර්ණවාහිනියේ කතා කල ගම්මුන් (දැයි හරියටම නොදනිමි) කීපදෙනෙක් කීවේ සිසුන් බීගෙන විත් ප්‍රදේශවාසී තරුණියකගේ අතින් ඇද ඇති බවත් ඒ සම්බන්ධව ගිය ගැටුම දුරදිග ගොස් සිසුන් කඩ කීපයකට පහර දී අලාබහානි කල බවත් ය.

පොලු රැගත් ගම්මුන් සිසුන්ට පහරදී ඇති බවත් බස් යොදා සිසු සිසුවියන් නිරුපද්‍රිතව වි.විද්‍යාල භූමියෙන් පිටතට ගෙ ඒමට සිදුවී ඇති බවත් සැලවිය. ගම්මුන් ඒ බස් වටකරගෙන ඇතුලේ සිටි සිසුන් "සැලකීම" සඳහා බසයෙන් බස්සවාගන්නට වෙරදරනු පෙණින.

සුපුරුදු පරිදි ප්‍රාදේශීය දෙවියා වන අමාත්‍ය මර්වින් සිල්වා ගේ නම ද සිද්ධියට ඈඳී ඇත. එපමණක් නොව ස්වල්ප වේලාවකින් ම ඔහු සිද්ධිය වූ ස්ථානයේ ප්‍රාදූර්භූත විය.

මෙසේ බස්රථවලින් සිසුන් බිමට ඇද පහරදීම සිදුව ඇත්තේ විවිද්‍යාලය අසල පමණක් නොවේ. පෑලියගොඩ, ආමර් වීදිය ආදී ප්‍රදේශ වලද සිදුවී ඇත. සිසුන් ගම්මුන්ට පහර දුන්නේය යන අදහස බැහැරකරන සිසුහු කියන්නේ මෙය මර්වින් ගේ වැඩක් බවය. විවිද්‍යාලය අසල ගල් පොලු ගෙන රැඟුමක් නිරත වූයේත්, සිසුන්ට පහර දුන්නේත්, රූපවාහිනියට මූණ දමා සිසුන්ට වරද පැටවූයේත් මර්වින් ගේ ආධාරකරුවන් බවය.

ගමේ මිනිස්සු සමග ගැටුමක් ඇතිවූයේ නම් ඔවුන් එතැනදී සිසුන්ට පහර දෙනු විනා පෑලියගොඩ ආමර්වීදිය වැනි ප්‍රදේශ වලදීද එලව එලවා පහර දෙනු ඇතැයි සිතිය නොහැකිය. සිසුවියන්ට පවා හිරිහැර කර ඇතැයි වාර්තා වේ. එනයින් මෙය වෙනත් සංවිධානාත්මක ක්‍රියාවක් බව පෙනී යයි.

දැන් මර්වින් දෙසට හැරෙමු. කැලණි සරසවිය තුල දේශපාලන බලය ඇත්තේ ජවිපෙටත් එජාපයටත් ය. ඒ දෙකම මර්වින් ගේ සතුරන් ය. එහෙයින් ඔවුන්ට එරෙහිව යමක් කිරීමට මර්වින්ට "අයිතියක්" ඇත. ඒ හැර කාලයකට වතාවක් කුණු බාල්දියක් පෙරලා නොගත්තොත් ඒ මර්වින් නොව නොට්ටිගේ පුතා යැයි රට්ටු කියනු ඇත.

මර්වින්, කියන්නට ඇත්තේ වැඩේ කැත බවය. හොඳටම කැතය. මේ කඩාකප්පල් කර ඇත්තේ සිසුන් විසාල ගණනකගේ අධ්‍යාපනයයි. මෙම ප්‍රශ්ණය දුරදිග ගිය හැටියට කලක් යනතුරු විස‍ඳේ යයි සිතන්නට අමාරුය.

පසුගිය වතාවල මෙන්ම මේ අවස්ථාවේදී ද සාධාරණය ඉෂ්ඨ නොවන බව අපි දනිමු. මක්නිසාදයත් මර්වින් යනු මහින්ද අධිරාජයාගේ සුවච කීකරු සුරතලෙකු බැවිනි.

Friday, June 5, 2009

බ්ලොග්කරුවනි. . .මීලඟ ගොදුර අප විය හැකියි !

ත්‍රස්තවාදීන් සමග යුද්ධය අවසන් කල පසු රජය තම මතයට විරුද්ධ ජනමාධ්‍යවේදීන් දඩයම් කිරීමේ භීෂණයක් අරඹා ඇත.

දේශපාලනික ලිපි ලියන සහෝදර බ්ලොග්කරුවනි. . . ඊලඟ ඉලක්කය හා ගොදුර අප වියහැකියි. ප්‍රවේශම් වෙමු.

Saturday, May 16, 2009

"වාමනයා" නොහොත් තමාවම ප්‍රමෝට් කර ගැනීම

කඩේට ගිය විට:
"..මුදලාලි මම අහවලා.. අර වාමනයා මෘදුකාංගය හැදුවේ...දන්නවද? ... මට සීනි කිලෝ එකක් දෙන්න...."

කෝල් එකක් ගැනීමේදී:
"..හෙලෝ... මම අහවලා.. අර වාමනයා මෘදුකාංගය හැදුවේ..දන්නව නේද?...මට අහවලාට කතා කරන්න පුලුවන්ද?.."

බස් රථයේදී:
"..ඔය දැං නැගපු කට්ටිය සල්ලි ගන්න...."
"..ආ..මම අහවලා.. අර වාමනයා මෘදුකාංගය හැදුවේ..දන්නව නේද?...මොරටුව එකයි...."

කමෙන්ට් දැමීමේදී:
"අයියලා දන්නවා ඇතිනේ මම කවුද කියලා... අර වාමනයා මෘදුකාංගය හදපු මල්ලි....මට මේ පෝස්ට් එක ගැන කියන්න තියෙන්නේ................"

මෙය "මඩ" නොවේ. වරදක් පෙන්වා දීමකි. ඒ වරද නැවත නොකරනු ඇතැයි බලාපොරොත්තු වෙමු. හේ තවත් වරදක් කලේය. එනම් ගූග්ල් සමූහයක ගිය සංවාද ඒවායේ රචකයන්ගේ අවසරයකින් තොරව තම පෝස්ට් එකේ ‍කමෙන්ට් ලෙස ඔහු විසින්ම දමා ගැනීමයි. එය පෙන්වා දුන් පසු එම සියලු කමෙන්ට් ඉවත් කර තිබුනි. එහෙත් ඒවා නොකල යුතු වැඩය. කමෙන්ටයක් අදාල හා අයත් වන්නේ එය පලකල පෝස්ටයට පමණක් බව ඉගෙන ගැනීම හා වෙනත් තැනක කමෙන්ට් තම පෝස්ටයකට දමා ගැනීම වැරදි බව ඉගෙන ගැනීම තමාවම මාර්කට් කර ගැනීමට වඩා වැදගත්ය.

Friday, March 27, 2009

පිස්සු පූසා ගේ මුල්ම සටහන

ආයුබෝවන් ! මම පිස්සු පූසා. මමත් බ්ලොග් එකක් ලියන්නයි ලෑස්තිය. මේක ලියන්නෙ සාජන් මහත්තයට හොරෙන් එයාගෙ නෝට් පොතේ. පුරු-පුරු. . .හොඳට බලාගෙන ඉන්න ඕනෙ සාජන් මහත්තයා එනවද කියල, හරිද? ("හරි..ලොක්කා.....")

මෙච්චර කල් මම සිංහල බ්ලොග් කියෙව්ව විතරයි. හැමෝම එක එක ජාතියෙ පෝස්ට් ලියනවා. පොලිටික්ස්, ටෙක්නිකල්, කවි, හැම දෙයක්ම. මට හිතුනා බ්ලොග් ගැන බ්ලොග් එකක් ලියන්න. බාහිර නිරීක්ෂකයෙක් විදියට.

එහෙනං ඉතිං වැඩි කතා නවත්තලා වැඩ පට්ටා....ං ගමු.